Tatlong bagay lang naman
Ang hindi ko maintindihan
Una ay ang sagot
Sa mahahabang palaisipan
Ikalawa ay ang galaw
Ng mga bituin at araw
Ikatlo ay ang kakaibang konseptong
Tinatawag na ikaw
Sa dinami-rami
Ng mga bagay
Na nalalaman
Ikaw lamang
Ang nakapagturo
Sa isipang ‘to
Na maging mangmang
Ikaw,
Tanging ikaw,
Ang tanging konsepto
Sa daigdig
Sa uniberso
At sa buong kalawakan
Na kailanman
Hindi ko maipaliliwanag
