Para sa dalagang nagtatago
Sa likod ng liwanag ng buwan
Huwag matatakot sa pagbabago
Huwag mailap sa walang hanggan
Ang mga bagay na iniwan
Dito sa daigdig mananatili
Ang pagdududa pakawalan
Magpahinga, maghunos-dili
Ang kalungkutan ay iwaksi
Ngunit malayang magdamdam
Pagkat bituin ang magiging saksi
Sa iyong pamamaalam
Huwag na huwag mangangamba
Sa likod ng liwanag ng buwan
Sapagkat sa araw naman nagmumula
Ang liwanag at ang kinabukasan
